أحس بالغيرة من الفنانين، كيف أتعامل مع الموضوع؟ | أسئلتكم

أهلًا بعودتك …… اشتقنا

توصلني عدة أسئلة من قرآء المدونة، وأحيانًا أحس إن الجواب ممكن يفيد آخرين

لذلك قررت إني أشارك الإجابات هنا

السؤال 1 :

(كيف ما اتأثر وأحس بالمنافسة من اللي أحسن مني؟ لأني إذا الموضوع له علاقة بالرسم أنا أكثر وحدة غيورة وأحس بمنافسة وتأثيرها النفسي مب حلو! )

واللهِ حبيت وضوحك وفهمك للمشاعر اللي تواجهك،

كيف مانتأثر ونحنا نشوف آلاف الرهيبين بالمجال ويوميًا؟ كيف مانحس بالمنافسة مع كل فنان جديد يظهر في محيطنا؟

نحتاج نتعمق أكثر بنوع المشاعر اللي نحس فيها هل هي غيرة (حسد) أو غيرة (غبطة) !

غيرة الحسد : تتمنى إنه ماينجح .. إن ماحد يعرفه ولا يزيد متابعينه، ولا تهنأ إنك ترتوت أعماله أو تدعمه، ولا تتمنى إنه يشتغل مشاريع رهيبة

غيرة الغبطة : تتمنى تكون في مكانه/مثله بدون ماينضر هو

في الواقع ممكن مايضايقنا وجود فنانين عالميين .. بقدر مايضايقنا وجود فنان بنفس ظروفنا وامكانياتنا وعمرنا.

أظن غيرة (الغبطة) شعور طبيعي عند كل شخص طموح .. والطَموح بيستفزه ظهور الطموحين، لأنه بيحس بشيء يدفعه إنه يبذل أكثر ويحاول أكثر .. بيحس إن فيه أحد قاعد يوصل لشيء هو يبغاه ويحاول فيه .. فـ لحد الآن كلش طبيعي

وهذي علشان نتعامل معها فيها حكي كثير .. برجعله لاحقًا

لكن إذا كانت غيرتك فيها من الحسد، هذي حلها إنك تهذّب نفسك وتربيها من جديد

ذكر نفسك بأن العالم واسع، والخير وفيروإنه يقدر يكون بأحسن حال وأنت كذلك بأحسن حال

عوّد عينك ماتطالع رزق غيرك، الموهبة رزق .. السعي رزق .. التطور والنمو رزق .. واطلب الله يكون لك نصيب مما تحب بحياتك

تأكد إنه مُستحق للنتيجة اللي وصل لها، وإنه بذل جهود انت مابذلتها للآن، لذلك هو حقه يشوف ويعيش الحلم الآن، وانك تقدر تعيش نفس التجربة إذا بذلت جهد يليق بحلمك.

نرجع لموضوع الغبطة

أظنها وحدة من أفضل المشاعر اللي ممكن نحس فيها .. لأنها تذكرنا بتقصيرنا، وتذكرنا بأحلامنا

محفز قليل التكلفة …. لا تحاربه، تقبل إنك راح تحس بهالنوع من المشاعر من وقت لآخر .. وكلّ المطلوب منك إنك تتحكم برد فعلك وقتها .. وش راح تسوي إذا جاك هالشعور المستفز؟

ممكن تتحرك .. تنجز مشروع مؤجل

ممكن تتابع كورسات اشتريتها ولا انهيتها

ممكن تتمرن على اسلوب جديد أو تتمرن عالتشريح وغيره

جرب تاخذ لو خطوة وحدة صغيرة، وإن كانت اطلاع على مقاطع / أعمال في مجالك كل ما جا هالشعور المزعج علشان يكون إنزعاج لصالحك.

وتأكد إن هذي المشاعر راح تقل كل ماكثر إنجازك وكل مارضيت عنه .. كل ماسعيت كل مالقيت إن الناس تغبطك مو العكس.

السؤال 2:

( أحاول أرسم بأساليب جديد و ترندي، لكني مهما حاولت وحطيت مراجع ألقى نفسي ارسم باسلوبي المعتاد … كيف أحل هالمشكله؟ )

همم، تنجح في تطبيق ستايل إذا كنت فاهمة تمامًا

القصور اللي يحصل في فهم الستايل هو اللي يخليك تبدا تخربط وترسم أشياء متعود عليها

لو إنك فاهم الستايل تماما ومحلله تحليل دقيق ومختبره بشكل كويس قبل لا تعتمده …. احتمالية خروجك عنه تكون ضئيلة

كيف تتأكد إنك فاهم الستايل طيب؟

ممكن تعجبك صورة من بينترست Pinterest أو انستقرام Instagram و تقول آووه هذا الستايل المثالي، بعتمده

بدون ماتكون فيه صور كافيه تبين جوانب الستايل .. يعني لما تشوف صورة مستقلة تعجبك غير لما تشوف عرض كامل للمشروع في بيهانس Behance وتفهم كل تفصيلة بالستايل

ممكن تعجبك طريقة رسم خلفية .. لكن مشروعك يحتاج رسم شخصية! هنا لو ماكنت الامور واضحة عندك تلقائي بترجع ترسم بطريقتك

الحل إنك تحلل الستايل علشان تقدر تطبق فيه أي شيء بالمجرّه.

افهم الكتل :

كيف كتل الرسم وكيف النسب؟ واقعية؟ خيالية؟ هلامية؟ حادة؟ مشطوفة؟ كيف هذا الرسام يحدد احجام العناصر في المشهد وماهيتها؟

افهم حدود الرسم :

هل توجد حدود في الرسم (Outline أم انه تلوين مباشر؟ هل هي فيكتور نظيف! هل هي كأقلام الرصاصة خشنه؟ هل هي متصله؟ متقطعة؟ هل هي بلون واحد في جميع الستايل؟ هل هي ملونه من عنصر لآخر؟ هل هي بنفسك السمك؟ أم سمك متغير؟

افهم الألوان :

كيف يلون؟ وش النمط اللي يختار الدجات بناء عليه؟ باردة/ حارة/ دافية؟ كيف يستخدم الألوان في المشهد؟ هل يميل لإن الخلفيات فاتحة مثلا؟ هل يوزع الألوان بنسب معينة .. الغالب رمادي مثلا والأحمر ١٠٪ بس؟

افهم الظل والنور :

وش اعدادات الظلال؟ هل هي من نفس اللون واللي يتغير بس البلندنق مود؟ ولا هي درجات اسود مُخفف الشفافية (Opacity) ؟ ولا هي ألوان مغايرة .. فمثلا العنصر وردي والظل أزرق؟

افهم الخامات :

وجربوا الفوتوشوب يا أصدقاء لأنه افضل بكثير في تركيب الخامات، وبالامكان تحركيه بالافترافكت Aftereffect عادي بدون مشاكل.

إذا فهمت هذي الامور وحددتها اختبر ستايلك في الشخصيات . في الخلفيات . في الأيقونات . في الكتابة

إذا نجحت فيهم، اعتمد الستايل ... لأن في هالحالة عندك أساس تقدر تبني عليه مشروع ناجح.

السؤال 3:

( أنا آرت دايركتر جديدة في عملي، مستوى الفريق أقل مني بكثير، ومهما اقترحت عليهم أشياء رهيبة ألقى إن المخرجات ماتعجبني .. ويشتغلون بأساليب قديمة … وش الحل! هل ابحث عن ستايلات تناسب مستواهم؟ )

أولًا … انت القائد، انت صاحب الصلاحية

أنت الشخص المخوّل والمسؤول عن الأخذ بيد الفريق وتطويرهم .. والملامة على أي تقصير ستعود إليك.

تأكد آنك تكون راضي عن المخرجات وعدم رضاك المستمر دليل وجود خلل إما مكن وإما منهم

لا تشتغل بمستواهم، اشتغل بمستواك وطور وعدل وبدل معهم لحد ماتوصل لنتيجة مرضية، طالما عندك الخبرة وصلها لهم

إذا سويت دورك بالكامل، وهو تحديد الستايل وتجهيز المود بورد والمراجعوشرحت لهم كافة التفاصيل وطلبتهم يلتزمون فيه

ولا التزموا .. وعدلت واعطيت ملاحظات وساعدتهم .. وستل النتيجة مو مضبوطة

فهذا قد يشير لأن الفريق بحاجة لتعديل .. إما يتطور بكورسات وإما تستغني عنهم

إما يمشون معاك لقدام .. وإما تستغني عنهم، بس لاتخليهم يرجعونك ورا أو يكونون عقبة لأنك بتكوم مُحاسب من الإدارة إذا ماحققت المأمول منك بعد مدة من الزمن.

وتأكد إنك ملبي احتياجات الفريق قبل ماتطالبهم بمستويات تفوقهم

وفر لهم الأجهزة والأدوات والتوجيه والإرشاد والبيئة الصحية والوقت المعقول للإنتاج والبريف الواضح .. لو وفرت كل هذي

ولا زالوا بمستوى ضعيف، واعطيتهم فرصة بعد التوضيح. قوي قلبك وابحث عن البديل.

ولا تنسى إن من واجبك تحسم الامور، تحدد التوجه الفني وتلزمهم فيه بدون أي تردد أو الاقتراح على استحياء

إذا عندكم اسئلة في المجال، اكتبولي في التعليقات

ونحدث التدوينة بالإجابات

(ملاحظة: هذة التدوينة مستعجلة، والغرض منها إجابة صديق)

مع كل الحب عايشة

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s